کویت مسجد بمبار کے والد کی 'العربیہ' سے خصوصی گفتگو
گذشتہ جمعہ کو خلیجی ریاست کویت میں اہل تشیع کی جامع مسجد امام جعفر الصادق میں خودکش حملہ کرنے والے بمبار فہد القباع کے والد سلیمان القباع نے بیٹے کی خوفناک حرکت پر گہرے دکھ افسوس کا اظہار کرتے ہوئے کہا کہ ان کے بیٹے کو دہشت گردی کی طرف جن لوگوں نے مائل کیا ہے انہیں کیفر کردار تک پہنچایا جانا چاہیے۔
نہایت مغموم انداز میں "العربیہ" سے بات چیت کرتے ہوئے سلیمان القباع نے کہا کہ وہ نہیں جانتے کہ ان کے بیٹے کو کب اور کن گناہ گار ہاتھوں نے ایک ایسے اقدام پر تیار کیا جس کا وہ تصور بھی نہیں کر سکتے ہیں۔
ایک سوال کے جواب میں بمبار فہد القباع کے والد نے کہا کہ میں نے کویت سٹی میں مسجد میں دھماکے اور اس میں فہد کے ملوث ہونے کی خبر ٹی وی پر دیکھی۔ یہ خبر میرے اور پورے خاندان کے لیے ایک بڑے صدمے کا باعث تھی۔ مجھے یقین نہیں آ رہا تھا کہ یہ خبر درست ہو سکتی ہے۔
سلیمان القباع نے بتایا کہ کویت واقعے سے چار دن قبل میری بیٹے سے ملاقات ہوئی۔ اس نے مجھے کہا کہ وہ ماہ صیام کے آخری عشرے میں اعتکاف کرنا چاہتا ہے، لیکن کسی شیطانی ہاتھ نے اسے وہاں سے نکالا اور کویت پہنچا دیا۔ اس کے بعد میں نے بیٹے کو نہیں دیکھا تا آنکہ ٹی وی پر خبر چلی جس میں اس کی لاش خودکش بمبار کے طور پر دکھائی جا رہی تھی۔
0 comments:
Post a Comment